Los xudeus en Galicia

ISBN 84-933244-1-8

Ma.Gloria de Antonio Rubio

Ed. Lostrego Apdo. 2221 15780 Santiago

En komparasion kon los djudios de Castilla, Catalonia, Aragon i otras rejiones de Espanya de onde salieron la mayoria de los ekspulsados de 1492, se save relativamente poko sovre los djudios de Galicia.

Segun lo apunta la autora del livro sovre los djudios de esta rejion autonoma de Espanya, Ma. Gloria de Antonio Rubio, esto seria devido prinsipalmente a 2 razones:

1. El chiko numero de djudios ke bivian en esta rejion, i

2. La eskasez de informasiones, en los archivos de Galicia, sovre las komunidades djudias de esta rejion.

Malgrado esto topamos en el livro (de 111 pajinas de 11x16.5 sms), una buena informasion bazika sovre la istoria de los djudios de esta parte de Espanya, sus institusiones relijiozas i komunitarias, sus kales i bedahemes, las relasiones kon la povlasion lokala i kon los reyes asta la ekspulsion i, despues de 1492, la aktividad de la Inkizision kontra los konversos ke kerian ainda ser djudios.

Un kapitolo partikularmente interesante es el ke trata de los lavoros i ufisios ke tenian los djudios de Galicia, ke paresian muncho, de este punto de vista, a los djudios de Castilla. Avia entre eyos merkaderes i arekavdadores de dasios ansi ke personas ke emprestavan kon intereso, i avia tambien medikos, shirurjianos i toda una seria de ufisiales komo plateros, shastres, teshedores, sapateros i mizmo agrikultores.

[Orijen: www.aki-yerushalayim.co.il]